ശബ്ദിക്കുന്ന മനസ്സ്
ചലിക്കാത്ത ചുണ്ടുകള്
ഞാന് മൂടി വെയ്ക്കുന്നു
എന്നെയും വാക്കുകളെയും!
നീറി പുകയുന്ന ഓര്മ്മകള്
വിസ്മൃതിയൊരു സ്വപ്നം!
വരണ്ടുണങ്ങിയ ഭൂമിപോല്
കണ്ണീരുണങ്ങിയ നയനങ്ങള്.
എനിക്ക് സുഖം തന്നെ
എല്ലാം ശുഭം തന്നെ
കേള്ക്കേണ്ട വാക്കുകള്
നിങ്ങളോട് പറയാനെളുപ്പം.
മദ്യമോ പുകവലിയോ
ഒന്നുമെനിക്കില്ലയെന്നാലും
ഒരു മായാലോകത്തിന്
ലഹരിക്കടിമ ഞാന്!
ഉന്മത്തതയില് ആറാടി
ദിനങ്ങള് കൊഴിയുമ്പോള്
ചിന്തകളൊക്കെ ഹോമിച്ചു
ഞാനെന്ന വികാരജീവി!
തിരിഞ്ഞു നോക്കാന് പേടി
മാന്ത്രികലോകം വെടിയാനും
എനിക്ക് ഞാന് ആവണ്ട
പ്രതിബിംബം മാത്രം മതി!
എന്റെ കാര്യം വിട്ടേക്കു
നിങ്ങള് സുഖമായിരിക്കൂ
മുഖംമൂടി അഴിഞ്ഞില്ലെങ്കില്
എന് മുഖം പുഞ്ചിരിക്കും!